မန်ချက်စတာ ယူနိုက်တက် အသင်းရဲ့နောက်ခံလူဟောင်း ဂယ်ရီနဗီးလ် က ဒီတစ်ပတ်မှာ အမှတ်ပေး ဇယား ဦးဆောင်သူ လီဗာပူး အသင်းကို အာဆင်နယ် အသင်း အနိုင် ရသွားခဲ့ပေမယ့် ချန်ပီယံ ဖြစ်နိုင်တဲ့ အသင်း တစ်သင်းလို့တော့ မခံစားမိကြောင်း ပြောကြား လာခဲ့ပါတယ် ။
ဂယ်ရီနဗီးလ် က အာဆင်နယ် ၃-၁ လီဗာပူး ပွဲအပြီး Sky Sports မှာ ” ပွဲအပြီး အာဆင်နယ် အသင်း အကြီးအကျယ် အောင်ပွဲခံနေကြတာတွေ့တော့ သူတို့ဟာ သူတို့ကိုယ် သူတို့ ချန်ပီယံ ဖြစ်နိုင်တဲ့ အသင်းတစ်သင်းလို့ မထင်ကြသေးဘူးလို့ ကျနော်ကတော့ မြင်ပါတယ် ။ အာဆင်နယ် က ချန်ပီယံ ပြိုင်ပွဲကနေ မထွက်ခွာချင်သေးတဲ့ အသင်း တစ်သင်း ပုံစံ နဲ့ ပိုတူနေပါတယ် ၊ သူတို့ရဲ့အောင်ပွဲခံပုံက မရင့်ကျက်တာပါပဲ ၊ နိုင်သွားလို့ စိတ်သက်သာရာ ရပြီး အောင်ပွဲခံသလို ဖြစ်နေပါတယ် ။”
” ကျနော်ကတော့ ကလစ်ချီ ပြောသွားတဲ့ ညှာတာမှု ကင်းမဲ့မှု ဆိုတဲ့ အသုံးကို သဘောတူပါတယ် ။ အာဆင်နယ် က လီဗာပူး ထက် ပိုကောင်းနေတဲ့ အသင်းပါ ၊ ဒါပေမဲ့ အာဆင်နယ် ပွဲကို ကြည့်တဲ့ အချိန်မှာ လီဗာပူး လောက် တခြား အသင်းတွေ အပေါ် ရက်စက်မှု မရှိဘူးလို့ ခံစားမိပါတယ် ၊ လီဗာပူး ရဲ့တိုက်စစ် က ပြိုင်ဘက် ဂိုးဧရိယာ အတွင်းမှာ ပိုပြီး အညှာအတာ ကင်းမဲ့ပါတယ်။ ”
” ဒီအချက်ကပဲ အာဆင်နယ် အသင်းကို နစ်နာ ဆုံးရှုံးမှုတွေ ဖြစ်စေမှာပါ ၊ ရာသီ အစတုန်းက အာဆင်နယ် အသင်း ချန်ပီယံ ဖြစ်လိမ့်မယ်လို့ ကျနော် ပြောခဲ့ဖူးပါတယ် ။ ဒါပေမဲ့သူတို့ ချန်ပီယံ မဖြစ်နိုင်တဲ့ အကြောင်းအရင်းတွေ အများကြီး မြင်ခဲ့ရပါတယ် ၊ သူတို့မှာ ပြိုင်ဘက် ဂိုးဧရိယာအတွင်း အဆုံးသတ် သေချာတဲ့ တိုက်စစ်မှူး တစ်ဦးမှ မရှိပါဘူး ။ ဒါက ရာသီကုန်ခါနီးမှာ အာဆင်နယ် အသင်းကို ကောင်းကောင်း ဒုက္ခပေးပါလိမ့်မယ် ။ ”
” အာဆင်နယ် က နည်းပြ ရဲ့သေချာ လေ့ကျင့်ပေးခြင်းကို ခံထားရတဲ့ အသင်း ၊ စနစ်ကျတဲ့ အသင်း ၊ ကစားပုံ တကယ်ကောင်းတဲ့ အသင်းပါ ။ ဒါပေမဲ့ အရေးကြီးဆုံး အရာတစ်ခု က ပျောက်ဆုံး နေဆဲ ဖြစ်နေပါတယ် ၊ လီဗာပူးမှာဆို ဂျိုတာ ဆာလာ ဂတ်ပို ဒီယက်ဇ် တို့ ရှိကြပါတယ် ၊ အကုန်လုံး က အန္တရယ် ပေးနိုင်တဲ့ ကစားသမားတွေချည်းပါ ၊ အာဆင်နယ် မှာက အဲ့ဒီလိုမျိုး ရှိမနေတာက ပြဿနာ ဖြစ်လာနိုင်ပါတယ် ။ ” လို့ ပြောကြား သွားခဲ့ပါတယ် ။
SM
