လီဗာပူး အသင်းကို သုံးဂိုး တစ်ဂိုး နဲ့ အနိုင် ရခဲ့တဲ့ ပွဲအပြီး အာဆင်နယ် အသင်း ရဲ့ အောင်ပွဲခံပုံ အပေါ် ဝေဖန် ထိုးနှက် နေကြတဲ့ ဘောလုံးသမားဟောင်းတွေနှင့် ပရိသတ်တွေကို ဂန်းနား ဂန္တဝင် တိုက်စစ်မှူး အီယန်ရိုက် က ပြင်းပြင်းထန်ထန် တုန့်ပြန် ပြောကြား လိုက်ပါတယ် ။
အာဆင်နယ် အသင်းဟာ အမှတ်ပေး ဇယား ထိပ်ဆုံးက လီဗာပူး အသင်းကို အနိုင်ယူ နိုင်ခဲ့တာကြောင့် ချန်ပီယံ ပြိုင်ပွဲထဲ ပြန်လည် ရောက်ရှိ လာခဲ့ပါတယ် ။ ပွဲချိန်အတွင်းမှာရော ပွဲအပြီးမှာပါ အာဆင်နယ် အသင်းဟာ အကြီးအကျယ် အောင်ပွဲ ခံခဲ့ကြသလို ကပ္ပတိန် အော်ဒီဂတ်လည်း အသင်း ရဲ့ ဓါတ်ပုံဆရာ စတူးအပ်ကိုပါ ဓါတ်ပုံ ရိုက်ပေးပြီး အောင်ပွဲ ခံခဲ့ပါတယ် ။
ဒါပေမဲ့ တစ်ဖက်မှာလည်း အာဆင်နယ် အသင်း ရဲ့အောင်ပွဲခံပုံဟာ လိုအပ်တာထက် ပိုလွန်းနေပြီး ချန်ပီယံဆု ရသွားသလိုကို အောင်ပွဲ ခံနေကြတာ ဖြစ်တယ်လို့ ကာရေဂါ ၊ ဖာဒီနန် နှင့် ဂယ်ရီနဗီးလ် တို့က ဝေဖန် ခဲ့ကြပါတယ် ။ အီယန်ရိုက် ကတော့ ဝေဖန်သူတွေ အားလုံးကို သူ့ရဲ့ တွစ်တာ အကောင့်ကနေ တစ်ဆင့် ပြန်လည် တုန့်ပြန် ပြောကြား သွားခဲ့ပြီး အောင်ပွဲ ခံစရာ ရှိတာ ဆက်ခံကြဖို့ ပရိသတ်တွေကို တိုက်တွန်း သွားခဲ့ပါတယ် ။
” နည်းပြ အာတီတာ အပေါ် အဆိုးမြင်တာတွေ များလှချည်လားဟ ၊ သူ့ အသင်း အနိုင်ရတာကို သူ အောင်ပွဲ မခံလို့ ဘာလုပ်ရမှာတုန်း ၊ မန်စီးတီး နှင့် လီဗာပူး တို့လို အင်အားကြီး အသင်းတွေကို အနိုင်ရရင် ခင်ဗျားတို့လည်း အောင်ပွံ ခံမှာပဲလေ ၊ သူ အောင်ပွဲခံတာ ဘာများမှားနေလို့လဲ ၊ နောက်ပြီး အော်ဒီဂတ် က စတူးအပ် မက်မာလိန်း နဲ့ အတူ North Bank မှာ ဓါတ်ပုံ ရိုက်နေတဲ့ အကြောင်းကိုလည်း လာပြောနေတယ် ။ စတူးအပ်က အာဆင်နယ် ကို ငါးနှစ်သား အရွယ်ကတည်းက အားပေးလာခဲ့တဲ့ အမာခံ ပရိသတ်တစ်ဦးလေ ၊ သူ့အတွက် အမှတ်တရ တစ်ခု ကျန်ရစ်နေအောင် ကပ္ပတိန်က လုပ်ပေးတာလေ ၊ သူ ဘာမှားနေလို့လဲ ။ ”
” လီဗာပူး အသင်းကို အနိုင်ရလို့ သူတို့ ပျော်နေကြတာလေ ၊ အပျော်တွေကို မသတ်ကြပါနဲ့ဗျာ ၊ ရာသီကုန်ဖို့ကလည်း လိုပါသေးတယ် ၊ သူတို့ ပြောနေပုံက ဘယ်အသင်းကို နိုင်နိုင် အောင်ပွဲခံလို့ မရတော့မယ့်ပုံပါပဲ ။ အင်္ဂလန် အသင်း ကမ္ဘာ့ဖလား နှင့် ယူရို ပွဲတွေမှာ ခြေစွမ်းကောင်း ရလဒ်ကောင်းနေရင် အားလုံး ခုန်ပေါက် ပျော်မြူး ကြတာပဲလေ ။ အာဆင်နယ် လည်း အတူတူပါပဲ ၊ သူတို့ရဲ့ ပျော်ရွှင်မှုကို မဖျက်ဆီးချင်ကြစမ်းပါနဲ့ဗျာ ၊ သူတို့ လုပ်နေတဲ့ အရာတွေကို ဆက်လုပ်ပါစေဗျာ ၊ ဘာပဲ ဖြစ်ဖြစ်ပေါ့ ၊ အပျော်တွေကိုတော့ မသတ်ကြပါနဲ့ ။ ”
” မန်နေဂျာကြီး ကလည်း အသင်း ချစ်စိတ် အပြည့်နဲ့ အောင်ပွဲ ခံတာလေ ၊ လူတွေက ကျနော်တို့ ဒီပွဲ ရှူံးပြီး ချန်ပီယံဆုကို လက်လွတ်ရဖို့ မျှော်လင့်ထားကြတာပါ ၊ ကျနော်တို့ အဲ့ဒီ အရာအပြင် ဒဏ်ရာ ပြဿနာတွေ နှင့် တခြားအရာ အားလုံးတွေကို ကျော်လွှား ခဲ့ရတာပါ ၊ ကျနော်တို့ အသင်း အပေါ် မနာလို မုန်းတီးစိတ်က ပြင်းထန် လွန်းလှပါတယ်ဗျာ ။ ”
” ကျနော်တို့ ဘာသာ ကျနော်တို့ အေးဆေး ပျော်ပါရစေဗျာ ၊ အာဆင်နယ် ပရိသတ်တွေရေ ဒီအခိုက်အတန့်ကို ပျော်ပျော်ကြီး ခံစားကြစမ်းပါဗျာ ၊ အမှတ်ပေး ဇယား ထိပ်ဆုံးက လီဗာပူး ကို နိုင်လို့ ဖြစ်တဲ့ အပျော်ပဲလေ ။ ”
SM
