၂၀၂၃ – ၂၀၂၄ ပရီးမီးယားလိဂ် ရာသီ စတင်လာတာ ပွဲစဉ် ၅ပွဲ ပြီးဆုံးသွားပြီဖြစ်ရာ ၊ အမှတ်ပေးဇယားကို လက်ရှိ ချန်ပီယံ မန်စီးတီး အသင်းက ရာနှုန်းပြည့် နိုင်ထားပြီး ၊ ဦးဆောင်လျက်ရှိပါတယ် ။ ထို့နောက် တော့တင်ဟမ် ၊ အာဆင်နယ် ၊ လီဗာပူးတို့က စီးတီး အနောက် အစဉ်လိုက် ရပ်တည်နေကြပါတယ် ။
ဒီရာသီမှာ အင်အားကြီး ကလပ် ၂သင်း ဖြစ်တဲ့ မန်ချက်စတာ ယူနိုက်တက်နဲ့ ချဲလ်ဆီးတို့ အခြေအနေ မဟန်နေကြပဲ ၊ ရမှတ် ၆မှတ်နဲ့ ၅မှတ်သာ ရရှိထားပြီး ၊ အဆင့် ၁၄နဲ့ ၁၅ နေရာမှာ အသီးသီး ရပ်တည်နေကြပါတယ် ။
ယူနိုက်တက်ဟာ ပြီးခဲ့တဲ့ ရာသီ အဆင့် ၃ နဲ့ ချန်ပီယံလိဂ်ဝင်ခွင့် ပြန်ရထားရာကနေ ၊ ဒဏ်ရာ ပြဿနာများစွာနဲ့ အတူ အခုလို ခြေစွမ်း သိသိသာသာ ကျဆင်းလာတာ ဖြစ်သလို ၊ ၂ရာသီဆက် စံချိန်တင် ပြောင်းရွှေ့ကြေးတွေ သုံးစွဲထားတဲ့ ချဲလ်ဆီးဟာလည်း အမေရိကန် ပိုင်ရှင်တွေရဲ့ လက်ထက် နည်းပြသစ် ၄ဦး အထိ လဲအပြီး ခြေစွမ်းက ထူးမလာနေသေးပါဘူး ။
လောလောဆယ် ခြေစွမ်းအရဆိုရင် စီးတီးတို့ကပဲ သမိုင်းတလျှောက် ပထမဆုံး အကြိမ် ၄နှစ်ဆက် ပရီးမီးယားလိဂ် ချန်ပီယံ ဖြစ်ဖို့ ရေပန်းစားမြဲ စားနေမှာ ဖြစ်ပါတယ် ။ တဖက်မှာ ချန်ပီယံလိဂ် ပြိုင်ပွဲကလည်း ယနေ့ညမှာ စတင်ကျင်းပသွားဖို့ ရှိရာ ၊ လက်ရှိ ချန်ပီယံ စီးတီးဟာ ဆားဘီးယား ကလပ် ရက်ဒ်စတား ဘဲလ်ဂရိတ်နဲ့ အုပ်စု အဖွင့်ပွဲ အဖြစ် ထိပ်တိုက် ရင်ဆိုင်မှာ ဖြစ်ပါတယ် ။
မနေ့က ပွဲကြို သတင်းစာ ရှင်းလင်းပွဲမှာ စီးတီး နည်းပြ ပက်ဂွာဒီယိုလာက ၄င်းတို့ အသင်းဟာ တရာသီလုံး နိုင်ပွဲဆက်နေမှာ မဟုတ်ပဲ ၊ အကျပိုင်းနဲ့ ရင်ဆိုင်ရမှာ ဖြစ်ကြောင်း ဖွင့်ဟရင်း ၊ အခြေအနေ မဟန်နေတဲ့ မန်ယူနိုက်တက်နဲ့ ချဲလ်ဆီးတို့ဟာလည်း ပြန်ပြီး နာလန်ထူမှာ ဖြစ်ကြောင်း မက်ဆေ့ခ်ျပေးသွားပါတယ် ။
ပက် က ” ဘောလုံးရာသီ တခု အတွင်း ကျွန်တော်တို့ဟာ အကျပိုင်းနဲ့ ရင်ဆိုင်ရတတ်ပါတယ် ။ ဒီတော့ အခု အနေအထားမျိုး တရာသီလုံး ဖြစ်နေမှာ မဟုတ်ပါဘူး ။ ဒါပေမယ့် ဒီလို စတင်နိုင်လိုက်တာက ကောင်းသလို ၊ အရေးကြီးတဲ့ အသင်းတွေဟာ ရမှတ် အတော်လေး စုဆောင်းထားနိုင်ကြပါပြီ ။ ”
” ဒါပေမယ့် မနေ့က ဂွတ်ဒီဆင်ပ့ါခ်က ပွဲကို ကျွန်တော် ကြည့်ရှုခဲ့ပြီး ၊ အဲဒီမှာ အာဆင်နယ် ဘယ်လောက်ထိ အင်အား တောင့်တင်းမှု ရှိနေတယ် ဆိုတာ ခင်ဗျားတို့လည်း သိရမှာပါ ။ သူတို့ဟာ သူမတူအောင် ခြေစွမ်း ထက်မြက်နေတာပါ ။ ”
” လီဗာပူးဟာလည်း ဒီနှစ်မှာ သူတို့ရဲ့ စိတ်ဓာတ်ခံယူချက် ဘယ်လောက်ထိ ပြင်းပြတယ် ဆိုတာ ထပ်မံ သက်သေပြနေပါပြန်ပါပြီ ။ ဟုတ်ပါတယ် ။ ချဲလ်ဆီးနဲ့ မန်ယူနိုက်တက်တို့ဟာ ခင်ဗျားတို့ မျှော်မှန်းထားကြသလို ရာသီသစ်ကို မစတင်ထားနိုင်သေးပါဘူး ။
” ဒါပေမယ့် ယူနိုက်တက်နဲ့ ချဲလ်ဆီးတို့ဟာ အနှေးနဲ့ အမြန် ရစ်သမ် ပြန်မိလာကြတော့မှာပါ ။ ဖလား ၃လုံး ချန်ပီယံ ဖြစ်အပြီး အခုလို အဖွင့် ၅ပွဲလုံး အနိုင်ရလိုက်တာက ကျွန်တော်တို့ အတွက် အရမ်း အရမ်း အရေးကြီးပါတယ် ။ ” လို့ ပြောကြားခဲ့ပါတယ် ။
SPORTS MYANMAR
