ယခုနှစ် ဘောလုံးရာသီ ပရီးမီးယားလိဂ်နဲ့ အက်ဖ်အေဖလား ချန်ပီယံ ဖြစ်ထားတဲ့ မန်စီးတီး အသင်းဟာ လာမယ့် စနေနေ့ည အစ္စတန်ဘူလ်မှာ ချန်ပီယံလိဂ် ဗိုလ်လုပွဲ အဖြစ် ကိုပါအီတာလီယာချန်ပီယံ အင်တာမီလန် အသင်းနဲ့ ထိပ်တိုက် ရင်ဆိုင်ရမှာ ဖြစ်ပါတယ် ။
ဒါဟာ မန်စီးတီး အတွက် ပထမဆုံး ချန်ပီယံလိဂ်ဖိုင်နယ် မဟုတ်သလို ၊ ပထမဆုံး အကြိမ် ဖလား ၃လုံး ပိုင်ဆိုင်ခွင့် ရမယ့် အနေအထားလည်း မဟုတ်ပါဘူး ။ ၂၀၂၀ – ၂၀၂၁ ဘောလုံးရာသီမှာဆို မန်စီးတီးဟာ ဖလား၄လုံး ပိုင်ဆိုင်နိုင်မယ့် အနေအထား အထိ ရောက်ခဲ့ပေမယ့် ၊ အက်ဖ်အေဖလား ဆီမီးဖိုင်နယ် နဲ့ ချန်ပီယံလိဂ်ဖိုင်နယ်မှာ ချဲလ်ဆီးကို ရှုံးခဲ့တာကြောင့် သမိုင်းသစ် ရေးထိုးနိုင်မယ့် အခွင့်အရေး တရပ် လက်လွှတ်ခဲ့ရပါတယ် ။
အခုတကြိမ်မှာတော့ စီးတီးဟာ မြို့ခံပြိုင်ဖက် မန်ချက်စတာ ယူနိုက်တက်ရဲ့ Treble အောင်မြင်မှုကို လိုက်မှီဖို့ ချန်ပီယံလိဂ် ဖလား တလုံးပဲ လိုအပ်ပါတော့တယ် ။ ၂၀၂၁ ချန်ပီယံလိဂ်ဖိုင်နယ်မှာ ပွဲထွက်ပါဝင်ခဲ့တဲ့ မန်စီးတီး ညာနောက်ခံလူ ကိုင်လ်ဝေါ်လ်ကာက ချဲလ်ဆီးကို ရှုံးခဲ့ရတဲ့ ခံစားချက်နဲ့ အတွေ့အကြုံတွေကို အခုလိုပဲ ဝေမျှပေးခဲ့ပါတယ် ။
The Telegraph နဲ့ တွေ့ဆုံခဲ့ရာမှာ ဝေါ်လ်ကာ က ” အဲဒီဖိုင်နယ် ပြီးတော့ ကျွန်တော့မှာ အဲဒီ ရှုံးနိမ့်မှု အတွက် စိတ်သက်သာရာ ရအောင် ပြန်လုပ်ဖို့ အတွက်တော့ အချိန် မရှိခဲ့ပါဘူး ။ ဘာလို့လဲဆိုတော့ ကိုယ့်နိုင်ငံ အတွက် ကိုယ်စားပြု ယှဉ်ပြိုင်ဖို့ ၊
အင်္ဂလန် လက်ရွေးစင် အသင်းနဲ့ စည်းချက်မိဖို့ ခပ်မြန်မြန်ပဲ သွားပူးပေါင်းခဲ့ရလို့ပါ ။ ”
” အဲဒီမှာ လက်ရွေးစင် အသင်းဆီ ရောက်လာကြတဲ့ ချဲလ်ဆီးကစားသမားတွေကို မြင်နေရတာက ခံစားရခက်ခဲ့ပါတယ် ။ သူတို့ကို ခင်ဗျားဖက်က ဂုဏ်ပြုစကား သွားပြောရပါတယ် ။ ဘာလို့လဲဆိုတော့ သူတို့ဟာ လက်ရွေးစင်အသင်းမှာတော့ ကျွန်တော် အသင်းဖော်တွေ ဖြစ်ကြလို့ပါပဲ ။ ဒါပေမယ့် ခံစားရ ခက်ခဲ့ပါတယ် ။ ”
” အဲဒီနောက် ကျွန်တော် ကိုယ့်ကိုယ်ကို စိတ်ဓာတ် ပြန်မြှင့်တင်ပြီး နောက်ရာသီ အတွက် အသင့်ဖြစ်အောင် ပြင်ဆင်ခဲ့ရပါတယ် ။ ဒါက ဘောလုံးပါပဲ ။ ဒါဟာ ခင်ဗျားရဲ့ ဘဝမှာ ကောင်းကောင်းမွန်မွန် မကျော်ဖြတ်နိုင်တဲ့ အစိတ်အပိုင်း တခု ဖြစ်ပါတယ် ။ အဲဒီအပြင် နောက်ရာသီ အစပိုင်းမှာ ကျွန်တော် ကစားခွင့်တွေ ရမနေခဲ့ပါဘူး ။ ”
” ဒါပေမယ့် ဘောလုံးမှာ အရာရာ ပြောင်းလဲနိုင်ပါတယ် ။ ခင်ဗျားဟာ ဒီလို ရလုဆဲဆဲ ၊ နိုင်လုဆဲဆဲ ပွဲတွေကို ကျော်ဖြတ်ရတဲ့အခါတိုင်း ဒီလို စိတ်ထိခိုက်မှုတွေတော ခံစားရမှာပဲလို့ ကျွန်တော် ထင်ပါတယ် ။ အသင်းကြီးအားလုံးဟာ ဒီလို အခြေအနေမျိုးတွေနဲ့ ရင်ဆိုင် ကျော်ဖြတ်ကြရတယ်လို့ ကျွန်တော် ထင်ပါတယ် ။ ”
” ဒါကပဲ ခင်ဗျားကို လိုချင်တဲ့ အောင်မြင်မှုဆီ တပတ်ပြန်ကွေ့လာနိုင်ဖို့ အနည်းငယ် တွန်းအားပေးကောင်း ပေးပါတယ် ။ အောင်နိုင်သူတွေ စင်မြင့်ပေါ် တက်ပြီး ဆုတံဆိပ်တွေ ရယူတာကို မြင်ရတဲ့အခါ ၊ သူတို့တွေ လမ်းလျှောက်လာရင်း လူတွေက လက်ခုပ်သြဘာ ပေးတဲ့အခါတွေမှာပေါ့ ။ ”
” ကျွန်တော်တို့လည်း ဒီလို အတွေ့အကြုံမျိုး ရဖူးတာပါပဲ ။ ခင်ဗျား ကွင်းထဲကနေ ထွက်လာတဲ့အခါ ချန်ပီယံလိဂ်တေးသွားကို ကြည့်မိ ၊ ချန်ပီယံလိဂ် ဖလားကို ကိုယ့်ရှေ့မှာ မြင်မိတဲ့အခါ ဒါက ခင်ဗျား တကယ် မမျှော်မှန်းခဲ့သလိုမျိုး ၊ စိတ်ထဲမှာ ဒါကြီးက တကယ် ဖြစ်နေပါလားဆိုပြီး တွေးထင်မိရလောက် ဖြစ်စေပါတယ် ။ ”
” ဒီလို အခိုက်အတန့်မျိုးကို ပထမတကြိမ် ခံစားခဲ့ဖူးတာကြောင့် အခုတကြိမ် ကွင်းထဲက ထွက်လာတာနဲ့ ဒါကို ရင်းနှီးပြီးသား ဆိုတာ ခင်ဗျား သိနေပါပြီ ။ ကိုယ့်ဘေးပတ်ဝန်းကျင်က လူတွေအပေါ် ယုံကြည်ပြီး ဘောလုံးကောင်းကောင်း ကစားနိုင်ဖို့ပဲ လိုပါတယ် ။ ” လို့ ပြောကြားခဲ့ပါတယ် ။
SPORTS MYANMAR
