ဂန်းနားကြယ်ပွင့်ဟောင်း အိုမာရီ ဟတ်ချင်ဆန် ရဲ့ အစ်ကို ဖြစ်သူ ဟာ လီဗာပူး အသင်းကို အာဆင်နယ် အသင်း အရေးနိမ့်ခဲ့တဲ့ အက်ဖ်အေ ဖလား ပွဲအပြီးမှာ လူငယ်တွေ ကို အခွင့်အရေး မပေးတဲ့ နည်းပြ အာတီတာ အပေါ် ဝေဖန် ပြစ်တင်မှု ပြုလုပ် သွားခဲ့ပါတယ် ။
အာဆင်နယ် အသင်းဟာ လီဗာပူး အသင်း နဲ့ ပွဲမှာ အဓိက ကစားသမား အများစုကို ပွဲထုတ် ကစားခဲ့ပေမယ့် အိမ်ကွင်းမှာ နှစ်ဂိုးပြတ် အရေးနိမ့် သွားခဲ့ရပြီး အက်ဖ်အေဖလား ပြိုင်ပွဲ ကနေ စောစောစီးစီး ထွက်ခွာ ခဲ့ရပါတယ် ။ အာတီဝာာ ဟာ လီဗာပူး နဲ့ ပွဲ အရန်လူစာရင်းမှာ နွမ်နယ်ရီ ၊ ဆော်ဆာ ၊ ရူရယ် ဝေါလ်တာစ် တို့ကို ထည့်ခဲ့ပေမယ့် တစ်ဦးကိုမျှ ထည့်သွင်း အသုံးပြုခဲ့ခြင်း မရှိပါဘူး ။
လီဗာပူး အသင်းကတော့ ဂိုးမရှိ သရေကျနေချိန်မှာတောင် ဘော့ဘီ ကလပ့်ခ် ၊ ကော်နာ ဘရက်ဒ်လေ တို့လို လူငယ် ကြယ်ပွင့်လေးတွေကို လူစားလဲ ထည့်သွင်းခဲ့ပါတယ် ။ ပွဲအပြီးမှာတော့ ဟတ်ချင်ဆန် ရဲ့ အစ်ကို ဖြစ်သူ Oshaye ဟာ လူငယ်တွေကို နေရာမပေးတဲ့ နည်းပြ အာတီတာ ကို အင်စတာဂရမ် အကောင့်ကနေ တစ်ဆင့် ဝေဖန် ပြစ်တင် သွားခဲ့ပါတယ် ။
” တချို့လူတွေ ကျွန်တော့်ညီလေးကို ပြန်တောင်းပန်ဖို့ အကြွေးတင်နေပါသေးတယ် ။ သူ အာဆင်နယ် က ထွက်ခွာတော့ ဝေဖန် တိုက်ခိုက်တဲ့ စာတွေ အမုန်းတရား မှတ်ချက်တွေ အများကြီး လက်ခံ ရရှိ ခဲ့တာပါ ၊ အခု ခင်ဗျားတို့ သူ ဘာကြောင့် အာဆင်နယ် ကနေ ထွက်ခွာသလဲ ဆိုတာ မြင်ကြပြီ ထင်ပါတယ် ။ ”
” ဒီတစ်ပတ်မှာ မန်စီးတီး ၊ ချဲလ်ဆီး ၊ လီဗာပူး ၊ စပါးအသင်း က လူငယ်တွေ ပွဲဦးထွက်တွေ ကစားခွင့် ရသလို ပွဲတွေလည်း ကစားခွင့် ရခဲ့ပါတယ် ။ အာဆင်နယ် အသင်းကတော့ လူငယ်တွေကို ကစားခွင့် မပေးခဲ့ပါဘူး
၊ အာဆင်နယ် အသင်းက လူငယ်တွေ အတွက် စိတ်မကောင်း ဖြစ်မိပါတယ် ၊ လူငယ်တွေကို လွတ်လပ်ခွင့် ပေးလိုက်ပါဗျာ ။ ” လို့ ဝေဖန် ရေးသား သွားခဲ့တာပါ ။
ဒီတစ်ပတ် အက်ဖ်အေဖလားပွဲမှာ မန်စီးတီး နည်းပြ ဂွာဒီယိုလာ ဟာ အော်စကာဘော့ ၊ ယာကော့ဘ်ရိုက် ၊ ဟာမီလ်တန် တို့ကို အသုံးပြု ခဲ့ပြီး ပိုချက်တီနို ဟာလည်း ဝါရှင်တန် ၊ ဂေးလ်ခရစ် ၊ ဂိုးလ်ဒင်း တို့လို လူငယ်တွေကို ကစားခွင့် ပေးခဲ့ပါတယ် ။ ဒါ့အပြင် စပါးနည်းပြ ပိုစတီကိုဂလူး ဟာလည်း စကားလတ် ၊ ဒွန်လေ ကို ထည့်သွင်း အသုံးပြု ခဲ့တာပါ ။
အိုမာရီ ဟတ်ချင်ဆန် ဟာ အာဆင်နယ် အသင်းမှာတုန်းက အသင်းကြီးနဲ့ အတူ ပုံမှန် လေ့ကျင့်ခန်း ဆင်းခွင့် ရခဲ့ပေမယ့် စီနီယာ အသင်းကြီးအတွက် တစ်ပွဲမှ ကစားခွင့် မရခဲ့ပါဘူး ။ ဟတ်ချင်ဆန် ဟာ ချဲလ်ဆီး အသင်းမှာတော့ ပရီးမီးယားလိဂ် တစ်ပွဲ ကစားခွင့် ရထားပြီး လက်ရှိ အချိန်မှာတော့ အင်စွစ်ခ်ျတောင်း အသင်းမှာ အငှား သွားရောက် ကစားနေပါတယ် ။
SM
