အာဆင်နယ် အသင်း နည်းပြ မီခေးလ် အာတီတာ ကတော့ ဂန်းနား ကြယ်ပွင့် မာတင်နယ်လီ ဟာ ဒီရာသီသွင်းဂိုး နှင့် ဂိုးဖန်တီးမှုတွေ သိပ်လုပ်နိုင်ခြင်း မရှိသေးပေမယ့် ပြိုင်ဘက် အသင်းတိုင်းကို ခြိမ်းခြောက်မှု အပြည့် ပေးနိုင်တဲ့ ကစားသမား အဖြစ် ရှိနေဆဲ ဖြစ်ကြောင်း ကာကွယ် ပြောကြား လိုက်ပါတယ် ။
ဘရာဇီး လက်ရွေးစင် မာတင်နယ်လီ ဟာ ပြီးခဲ့တဲ့ ရာသီတုန်းက အာဆင်နယ် အတွက် ပရီးမီးယားလိဂ် ၃၆ ပွဲ ကစားရာမှာ သွင်းဂိုး ၁၅ ဂိုး ၊ ဂိုးဖန်တီးမှု ၅ ကြိမ် အထိ ပြုလုပ် နိုင်ခဲ့သူပါ ။ ဒီရာသီ မှာတော့ မာတင်နယ်လီ ရဲ့သွင်းဂိုး ပါဝင် ပတ်သက်မှုဟာ အတော်လေး နည်းပါး လာခဲ့ပြီး ၁၆ ပွဲ ကစားအပြီး သွင်းဂိုး ၂ ဂိုး ၊ ဂိုးဖန်တီးမှု ၂ ကြိမ်သာ ပြုလုပ် ထားနိုင်ပါတယ် ။
အာဆင်နယ် နည်းပြ အာတီတာ ကတော့ မာတင်နယ်လီရဲ့ စွမ်းဆောင်ရည် အပေါ် စိုးရိမ် နေကြမှုတွေကို ပယ်ချ သွားခဲ့ပြီး ဘရာဇီးသားဘက်က ကာကွယ် ပြောကြား သွားခဲ့ပါတယ် ။ ” ရှင်းပြဖို့တော့ အတော် ခက်ခဲပါတယ် ၊ တစ်ခါတစ်လေ ကိုယ့်ရဲ့ ဆုံးဖြတ်ချက် နဲ့ သက်ဆိုင်သလို ကိုယ် ကန်လိုက်တဲ့ အလုံးက တိုင်ထိ သွားတာ ၊ လွဲချော် သွားတာကြောင့်လည်း ဖြစ်နိုင်ပါတယ် ။ ”
” မာတင်နယ်လီ က တကယ် ကြိုးစား ကစား နေတာပါ ၊ သူက ကျနော်တို့ အသင်းမှာ ခြိမ်းခြောက်မှု အလုပ်နိုင်ဆုံး ကစားသမားပါပဲ ။ ဘောလုံး ရှိတဲ့ အချိန် ၊ မရှိတဲ့ အချိန် သူ့ရဲ့ နေရာယူ ကစားပုံ ၊ ပြိုင်ဘက် နောက်တန်း အပေါ် ဖိအားပေးပုံတွေကြောင့် ကျနော်တို့ အသင်းရဲ့ အဓိက ကစားသမား ဖြစ်နေတာပါ ၊ သူ သွင်းဂိုးတွေ ဂိုးဖန်တီးမှုတွေ ပြန်ရလာပါလိမ့်မယ် ။ ”
” မာတင်နယ်လီ မှာ ယုံကြည်မှု နဲ့ ပတ်သက်ပြီး ပြဿနာ မရှိပါဘူး ။ တခါတလေ မှာတော့ သူ့အနေနဲ့ ခေါင်းမော့ပြီး တဖက် အသင်းရဲ့ ခံစစ်ကို ထိုးဖောက် ကျော်ဖြတ်ကာ အသင်းဖော်တွေကို ပံ့ပိုး ပေးဖို့ လိုအပ်ပါတယ် ၊ ပြိုင်ဘက် အသင်းရဲ့ ဂိုးဧရိယာ ထဲကို ချိန်သားကိုက် ပြေးဝင် လှုပ်ရှားဖို့ ဆိုတာက အခက်ခဲဆုံး အရာပါပဲ ၊ ဒါပေမဲ့ ယုံကြည်မှု ပျောက်ဆုံးနေတာမျိုးက မာတင်နယ်လီ မှာ ဘယ်တော့မှ မဖြစ်မယ့် အရာတစ်ခု ဖြစ်တယ် ဆိုတာ ကျနော် ပြောရဲပါတယ် ။ ” လို့ ပြောကြား သွားခဲ့ပါတယ် ။
SM
