ချဲလ်ဆီး အသင်းဟာ ပြီးခဲ့တဲ့ နွေရာသီ အတွင်း ကစားသမားသစ် အမြောက်အမြား အတွက် စံချိန်တင် သုံးစွဲမှုတွေ ဆက်လက် ပြုလုပ်ခဲ့ရာ ၊ ဘရိုက်တန်ကနေ အီကွေဒေါ လက်ရွေးစင် ကွင်းလယ်လူ မွိုက်ဆက်စ် ကိုင်စီဒိုကို ဗြိတိန်စံချိန်တင် ပြောင်းရွှေ့ကြေး ပေါင် ၁၁၅သန်းနဲ့ ခေါ်ယူခဲ့ခြင်းလည်း တခု အပါအဝင် ဖြစ်ခဲ့ပါတယ် ။
တော့ဒ်ဘိုလီနဲ့ အမေရိကန်ပိုင်ရှင်တွေဟာ အတွေ့အကြုံရင့် ကစားသမားတွေထက် နှစ်ရှည် စီမံကိန်းနဲ့ လည်ပတ်လို့ ရနိုင်မယ့် အလားအလာရှိ လူငယ်ကြယ်ပွင့်တွေကိုသာ ရွေးချယ် ခေါ်ယူနေတာကြောင့် အသင်းရဲ့ ရလဒ်ပိုင်း ၊ ခြေစွမ်းပိုင်း မတည်ငြိမ်မှုက တနှစ်အတွင်း မကြာခဏ ဖြစ်နေတာကို တွေ့ရပါတယ် ။
ချဲလ်ဆီး နောက်ခံလူဟောင်း ဖရန့် လီဘို့ဖ်ကတော့ သူ့အသင်းဟောင်း အနေနဲ့ ပြီးခဲ့တဲ့ နွေရာသီတုန်းက ကိုင်စီဒိုကို သန်း၁၀၀ကျော် ပေးပြီး ခေါ်ခဲ့တာထက် အတွေ့အကြုံရှိ အင်္ဂလန် ကွင်းလယ်လူ ၂ဦး ဖြစ်တဲ့ လက်ရှိ တော့တင်ဟမ် ကြယ်ပွင့် ဂျိမ်းစ်မက်ဒီဆင်နဲ့ ဝက်စ်ဟမ်း ကြယ်ပွင့် ဂျိမ်းစ်ဝက်ပရောက်စ်တို့ကိုသာ ခေါ်ယူခဲ့သင့်ကြောင်း ဖွင့်ဟလာပါတယ် ။
လီဘို့ဖ် က ” ပြီးခဲ့တဲ့ နွေရာသီတုန်းက ချဲလ်ဆီးဟာ ဂျိမ်းစ်မက်ဒီဆင် ၊ ဂျိမ်းဝက်ပရောက်စ်လို အသင်း အတွက် အရည်အသွေးများစွာ ယူဆောင်ပေးနိုင်ပြီး ၊ ငွေကြေး နည်းနည်းပဲ ကုန်ကျမယ့် ကစားသမားတွေကို ခေါ်ယူခဲ့သင့်တာပါ ။ သူတို့ကို ကလပ်ဖက်က ဘာကြောင့် လျစ်လျူရှုခဲ့လဲ ဆိုတာ ကျွန်တော် နားမလည်နိုင်ပါဘူး ။ ”
” ဒီတပတ်မှာလည်း ပိုချက်တီနိုက သူ့ကစားသမားတွေဟာ ကြပ်ညှပ်တဲ့ ပွဲစဉ်ဇယားတွေမှာ မကစားနိုင်လောက်ဘူးလို့ ထုတ်ပြောလာပါတယ် ။ သူဟာ အမှန်ကို ပြောနေတာပါ ။ ငွေသုံးတယ်ဆိုတာ ရူးလောက်စရာ ငွေပမာဏ သုံးဖို့ ဆိုလိုတာ မဟုတ်ပါဘူး ။ မက်ဒီဆင်နဲ့ ဝက်ပရောက်စ်ဆိုရင် ငွေအများကြီး မကုန်သလို ၊ အတွေ့အကြုံတွေလည်း ပိုမို ယူဆောင်ပေးနိုင်ပါတယ် ။ ” လို့ ပြောကြားခဲ့ပါတယ် ။
လက်ရှိ ချဲလ်ဆီးရဲ့ အဓိက ကွင်းလယ် အတွဲအဖက် ဖြစ်တဲ့ အန်ဇို ဖာနန်ဒက်ဇ်နဲ့ ကိုင်စီဒိုတို့ဟာ ရာသီကုန်ခါနီးလာပေမယ့် အခုအချိန်အထိ အတွဲအဖက် မိပြီး ၊ တိုက်စစ်ခံစစ်အပေါ် မျှမျှတတ ကူညီပံ့ပိုးပေးနိုင်မှု ကြီးကြီးမားမား မရှိသေးပါဘူး ။ ဒါနဲ့ ပတ်သက်ပြီး လီဘို့ဖ်က မအံ့သြမိကြောင်း အခုလိုပဲ ထပ်မံ သုံးသပ်လာပါတယ် ။
လီဘို့ဖ် က ” ခင်ဗျားဟာ မွိုက်ဆက်စ် ကိုင်စီဒို အတွက် ခံစားပေးရပါမယ် ။ ဘာလို့လဲဆိုတော့ ဘယ်သူမှ ဒီလို တန်ကြေး ဖိအားမျိုးနဲ့ မထိုက်တန်ကြလို့ပါ ။ ဒီလို စီးပွားရေး ဆန်တာတွေက ကစားသမားတွေ အပေါ်မှာ တောင်းဆိုမှု ကြီးမားလာစေတယ် ဆိုတာ ကျွန်တော်တို့ အားလုံး သိထားကြပါတယ် ။ ”
” တခါတလေ ဒီအခြေအနေ ၊ ဖိအားဒဏ်ကို ခံနိုင်ဖို့ ခက်ပါတယ် ။ သူဟာ တကယ့် အံ့မခန်း ကစားသမားကောင်း တယောက်လို့ ကျွန်တော်တို့ သိထားသည့်တိုင် ၊ သူဟာ အတွေ့အကြုံ မရင့်ကျက်သေးပါဘူး ။ သူသာ လီဗာပူးဆီ ပြောင်းသွားခဲ့ရင် ၊ ဘယ်သူမှ ယှဉ်မရအောင် ကောင်းသွားနိုင်ပါတယ် ။ ဘာလို့လဲဆိုတော့ သူနဲ့ တွဲကစားမယ့် ကစားသမားတွေကြောင့်ပါ ။ ”
” အန်ဇို ဖာနန်ဒက်ဇ်လည်း ထိုနည်း၄င်းပါပဲ ။ သူဟာ ကမ္ဘာ့ဖလား ချန်ပီယံ တယောက် ဖြစ်ပေမယ့် ၊ အတွေ့အကြုံ မရင့်သေးသလို ၊ အတွေ့အကြုံ နုနယ်တဲ့ ကစားသမားတွေနဲ့ ဝန်းရံခြင်း ခံထားရပါတယ် ။ သူတို့ ၂ယောက် အတွဲ အခုထိ အလုပ်မဖြစ်သေးတာနဲ့ ပတ်သက်ပြီး ကျွန်တော် မအံ့သြမိပါဘူး ။ ”
” လီဗာပူးက အလက်ဆစ် မက်အယ်လစ္စတာကိုပဲ ကြည့်လိုက်ပါ ။ သူ ကစားတာ အရမ်းကောင်းနေပါတယ် ။ ဘာလို့လဲဆိုတော့ သူဟာ ယုံကြည်လို့ ရနိုင်တဲ့ ကစားသမားတွေနဲ့ ဝန်းရံခံထားရလို့ပါ ။ ဒီနေရာမှာ ချဲလ်ဆီးဟာ အတွေ့အကြုံ နုတဲ့ ခေတ်တခေတ်ဆီ ရောက်နေပါတယ် ။ ” လို့ ပြောကြားခဲ့ပါတယ် ။
SPORTS MYANMAR