ဝက်စ်ဟမ်း အသင်းရဲ့ တိုက်စစ်မှူး အန်တိုနီယို ကတော့ နယူးကာဆယ် တိုက်စစ်မှူး ဝီလ်ဆင် နဲ့ အတူ BBC ရဲ့ The Footballer’s Football Podcast အစီအစဉ် မှာ ပါဝင် ခဲ့ပြီး အာဆင်နယ် အသင်း ရဲ့ချန်ပီယံဆု တိုက်ပွဲမှာ ခြေချော်သွားပြီလား ဆိုတဲ့ အကြောင်းအရာကို ဆွေးနွေး ပြောဆို သွားခဲ့ပါတယ် ။
” အာဆင်နယ် နဲ့ ပွဲမှာ ပွဲအစ ၃ မိနစ်လောက်အထိ ကျနော် တို့က သူတို့ကို အသာစီးနဲ့ ကစားနေခဲ့တာပါ ၊ ကျနော့်အထင် အဲ့ဒီ ၃ မိနစ်အတွင်း ကျနော်တို့ ဂိုးပေါက် ကန်သွင်းမှု ၁ ကြိမ် ထောင့်ကန်ဘော ၁ ကြိမ် ရခဲ့ပါတယ် ။ နောက်တော့ အာဆင်နယ် အသင်း တိုက်စစ်ပြန်ဆင်ခဲ့ပြီး ဂိုးရသွားခဲ့ပါတယ် ၊ နောက်တစ်ကြိမ် ထပ်တိုက်စစ်ဆင်တဲ့ အချိန်မှာလည်း နောက်ထပ် သွင်းဂိုး တစ်ဂိုး ရသွားခဲ့ပါတယ် ။ အဲ့ဒီ အချိန်မှာ ကျနော် ‘ သွားပြီ ထင်တယ် ၊ ငါးဂိုးလောက် ပြတ်တော့မလား မသိဘူး ‘ လို့ ဖြစ်သွားခဲ့တာ အမှန်ပါပဲ ။ ”
” အခြေခံကျကျ ပြောရရင် အာတီတာ လုပ်နေတဲ့ အရာတွေက စီးတီး လုပ်နေခဲ့တဲ့ အရာတွေပါပဲ ၊ အာတီတာ က ပက် လုပ်တဲ့ အရာတွေ အားလုံးကို လေ့လာ သင်ယူခွင့် ရခဲ့တာပါ ။ သူ အာဆင်နယ် ကို ပြောင်းချိန်မှာ စီးတီး မှာ သင်ယူ ခဲ့ရတဲ့ အရာတွေ အားလုံးကို Copy / paste ပြီး လုပ်ဆောင် နေတာ ဖြစ်ပါတယ် ၊ ကျနော် အာတီတာ ကို အပုပ်ချ ပြောဆို နေတာ မဟုတ်ဘူးနော် ။ ”
” ပက်ဆီက သင်ယူ ခဲ့ရတဲ့အရာတွေနဲ့ ပက်ကို အသာစီး ရယူ ပြထားနိုင်တာက တကယ့်ကို မယုံနိုင်စရာပါပဲ ။ ရူးသွပ်ဖို့ ပိုပြီး ကောင်းတဲ့အရာက အာဆင်နယ် အသင်း လုပ်ဆောင် နေတဲ့အရာတွေပါပဲ ၊ ကျနော် ဝက်စ်ဟမ်း နှင့် အာဆင်နယ် ပွဲကို အရန်ခုံကနေ ကြည့်နေချိန်မှာ ‘ ငါသာ မျက်လုံး မှိတ်ထားရင် ခု ကစားနေတာ မန်စီးတီးလို့ပဲ ထင်နေမိမှာ အသေအချာပဲ ‘ လို့ တွေးမိ ခဲ့တဲ့ အထိပါပဲ ။ ”
” သူတို့ ကစားတဲ့ပုံက တောင်ပံ ကစားသမား နှစ်ဦးရယ် ၊ နံပါတ် ၁၀ နေရာမှာ ကစားနေတဲ့ ကွင်းလယ်လူ နှစ်ဦးရယ် ၊ နောက်အထိ ဆင်းကစားတဲ့ တိုက်စစ်မှူး တစ်ဦးရယ် နဲ့ပါ ၊တကယ့်ကို မန်စီးတီး အတိုင်းပါပဲ ။ တကယ့်ကို စိတ်ရှုပ်စရာပါပဲ ၊ အာဆင်နယ် ရဲ့ ကစားပုံကြောင့် ကျနော်တို့ ကိုယ့်ပုံစံ အတိုင်း ကိုယ် ကစားလို့ မရခဲ့ပါဘူး ၊ သူတို့က ကျနော်တို့ကစားကွက် တည်မရအောင် ကစားသွားကြတာပါ ၊ တကယ့်ကို မယုံကြည်နိုင်စရာပါပဲ ။ ”
” အာဆင်နယ် အသင်းသွင်းသွားတဲ့ ပထမဂိုး နှင့် ဒုတိယဂိုးကိုပဲ ကြည့်ကြည့်ပါ ။ ဆာကာ ပြေးသွားတော့ ခရက်စ်ဝဲလ် က သူ့နောက် လိုက်ကပ်ရပါတယ် ၊ အဲ့ဒီ အချိန်မှာ အော်ဒီဂတ် က ခရက်စ်ဝဲလ် နောက်ကနေ ပြေးပြီး ချိန်သားကိုက် ကန်သွင်း သွားခဲ့တာပါ ၊ လူတွေက ခရက်စ် က ကိုယ့်လူကိုယ် မကပ်ထားဘူးလို့ ဝေဖန် နေကြပါတယ် ၊ အမှန်တကယ်က အာဆင်နယ် က လူတစ်ယောက် ပိုသာနေအောင် ကစားပြသွားခဲ့တာပါ ။ ”
” အာဆင်နယ် ကစားသမားတွေက နေရာတိုင်းမှာ ရှိနေခဲ့ကြတာပါ ။ သူတို့ရဲ့ အရည်အသွေးက လုံးဝ ကို အံ့ဖွယ် ပါပဲ ၊ ကျနော် သူတို့ကို ချီးကျူး ချင်ပါတယ် ၊ နောက်ပြီး သူတို့ကို အမှန်တကယ် အမှတ်ပေး ချန်ပီယံ ဖြစ်စေချင်ပါတယ် ၊ တကယ် ပြောတာပါ ၊ စီးတီးမှာ သူငယ်ချင်း အချို့ ရှိပေမယ့် အာဆင်နယ် အသင်း ချန်ပီယံ ဖြစ်တာကို မြင်ချင်ပါတယ် ။ ဒါမှလည်း အသစ်အဆန်းလေး တစ်ခု ဖြစ်မှာပေါ့ဗျာ ။ ” လို့ ပြောကြား သွားခဲ့ပါတယ် ။
SM
